Ensaluto

Blogo de Kirilo

bildo de Kirilo

Ŝerco: Efika pilolo

Tomaso tre malbone dormas, pro kio li ofte tro malfrue ellitiĝas kaj ne ĝustatempe atingas sian laborlokon.

Lia estro tial jam ofte koleriĝis, finfine li minacas al Tomaso, ke li maldungos lin, se ne pliboniĝos lia akurateco.

Tomaso iras al la doktoro, kiu donas al li pilolojn por pli rapida endormiĝo. Kaj fakte, Tomaso post gluto de pilolo bonege dormas. Li elltiĝas tute satdorminta, manĝas bongustan matenmanĝon kaj kontente veturas al la laborloko.

Tie feliĉe li diras al sia estro: "Ho ĉefo, ne estas plu kaŭzo min maldungi, la piloloj kontraŭ maldormemo vere funkcias!"

"Bone", respondas la estro,  "sed kie vi estis hieraŭ?!"

bildo de Kirilo

Du demandoj al lingvistoj kaj lingvemuloj

Saluton al ĉiuj!

En Ipernity mi antaŭ nelonge kreis du mallongajn blogaĵojn, por kiuj mi demandus vian subtenon. Smile

Vi povas helpi min per tio, ke vi esprimas vian lingvan senton pri la du fenomenoj, kiujn mi priparolas en la blogaĵoj, aŭ en Ipernity aŭ en komento ĉi tie.

http://www.ipernity.com/blog/144366/257509

http://www.ipernity.com/blog/144366/258139

Multan dankon!

bildo de Kirilo

Ŝerco: Du aŭtistoj

Kruko sur mallarĝa arbara ŝoseo proksimiĝas al aŭto el la mala direkto.

Kvankam estas sufiĉe da spaco, li per mezlena veturado devigas la alian veturiganton malrapidiĝi. Kiam la aŭtoj estas apudaj, Kruko subenkrankas la vitraĵon kaj krias al la alia veturiganto: "Porko!", kaj pluveturas.

La alia aŭtisto ekkoleregas, fie sakrante rigardas per la retrospegulo al Kruko kaj ...

surveturas la porkon, kiun Kruko ĵus antaŭe pasis.

bildo de Kirilo

Kiam mi ekamas programon

Mi ĵus skribis mallongan retleteron al kolego, al kiu mi hieraŭ sendis kelkajn dosierojn retpoŝte. Hodiaŭ mi demandis nur, ĉu li ricevis ĉion, ĉar en la estinteco mi jam plurfoje "perdis" retleterojn kun grandaj aldonaĵoj - kaj ne sciante tion mi koleriĝis, ke la ricevinto ne respondis, kaj la alia persono koleriĝis, ke mi nenion sendis.

Ĉiuokaze, mi skribis mian mallongan peton pri konfirmo, klakis "sendi", kaj subite aperis ŝprucfenestro "Ŝajne via mesâgo rilatas al aldonaĵo, sed vi nenion aldonis. Ĉu vi volas aldoni dosieron nun aŭ sendi la mesaĝon senŝanĝe?".

Por sekundo mi miris, sed rapide ekĝojis, ke ekzistas tiom inteligenta retpoŝta programo! Kiom ofte en la pasinteco mi sendis retleterojn sen la aldonaĵoj promesataj en la teksto...

La mirinda programo estas KMail, parto de la KDE-programarkompilaĵo (la aktuala versio estas 4.4.2, en Vindozo kaj MacOS ĝi estas ankoraŭ eksperimenta, sed tio estas bona kialo ŝanĝi al Linukso), kiun mi povas varme rekomendi al ĉiuj. Por ĝi ekzistas ankaŭ Esperantaj lingvoversio kaj klavaro.

bildo de Kirilo

Ŝercoj

Estas la jaro 1937a. Okaze de la 50a datreveno de la Unua Libro antaŭ la centralo de S.A.T. oni volas starigi novan flagstangon (por verda flago, kompreneble). Du Sat-anoj do fosas truon, starigas la maston kaj kontentas pri ĉi ĉio. Krom ke pro la fosado restis iom da tero. Ĉar ili ne scias kion fari kun ĝi, ili fosas duan truon por enigi la teron tie. Sed denove poste restas troa tero. Do ili fosas trian truon ktp. Eŭgeno Lanti, kiu observis siajn subulojn dum longa tempo de sia oficejo, finfine ne plu eltenas: Li malfermas la fenestron kaj krias: "Kamaradoj, vi devas fosi pli profunde!"

--------------------------------

Renato Corsetti transdonas la oficejon de UEA al Probal Daŝgupta. Poste la formalaĵoj ili kunsidas kaj babilas. Iam Corsetti demandas: "Probalo, ĉu en via lando ekzistas multaj homoj, kiuj decide neniam lernus Esperanton?" - "Jes," respondas Daŝgupta, "mi eĉ taksus ilian nombron je minimume 500 milionoj!" - Respondas Corsetti: "Nu bone, pli-malpli tiom, kiom en Eŭropo."

--------------------------------

Demando al Pola Radio: "Ĉu ĝustas, ke la pola parlamento hieraŭ unuanime rezoluciis favore al Esperanto?"

Respondo: "Jes, principe tio ĝustas. Sed ne estis hieraŭ, sed antaŭhieraŭ. Kaj ne estis unuanime, sed per 95%-a plimulto. Kaj ne estis favore, sed kondamne al E-o..."

 

 

Mi fripone adaptis kelkajn ŝercojn el la socialisma epoko. ;-)

opera malsano

La Deutsche Oper (Germana Operejo) en Berlino ĉiun jaron dediĉas specialan atenton al unu komponisto. Kaj (1a bonŝanco) ĉi-jare temas pri Richard Wagner (Ríĥart Vágner), mia plej ŝatata komponisto, oni surscenigis/-as entute ses el liaj dek tri operoj/muzikdramoj. Ĉar mi donace ricevis (2a bonŝanco) la t.n. ClassicCard, mi havis la eblecon 1 horon antaŭ la komenco de ĉiu spektaklo aĉeti bileton por la plej bona loka restanta po nur 10 eŭroj (ĉe regula vendado mi pagus 84€!).

Do, mi kaptis la unikan okazon kaj ene de nur unu semajno mi spektis kvar operojn, kiuj daŭris inter 2,5 kaj 4 horojn: Lohengrin, Tannhäuser, Der Fliegende Holländer (La Fluganta Holandano) kaj Die Meistersinger von Nürnberg (La nurenbergaj majstrokantistoj)! Tio ja ne plaĉus al tre multaj homoj kaj parte estis fortostreĉo, sed mi ripetus ĝin senhezite!

Partoprenis renomaj operistoj kiel Waltraud Meier kaj Ben Heppner, la Deutsche Oper krome havas bonan orkestron kaj eksterordinare bonan ĥoron, kiu ja tre gravas ĉe Wagner.

Tamen mi nur parte estis kontenta. Kial? Mi simple ne povas akcepti, se reĝisoroj perfortas la verkon. Por ke oni ne miskomprenu: Mi entute ne estas tia tradiciemulo, kiu akceptas nur kostumojn historie ĝustajn kaj plenan obeon de la surscenigantoj la la reĝiaj instrukcioj de la komponistoj - male, bonaj verkoj miaopinie estas nur alegorioj de io eterne vera, pro tio ili ne devas aperadi nur en sia origina ekstera formo. Ne pri tio temas, sed pri la misŝanĝo de la kerna enhavo! Mi ne povas plendi pri Lohengrin aŭ la Meistersinger (kiu fakte estis unu el miaj plej plezuraj vizitoj en operejo!), sed la fina parto de Tannhäuser kaj la tuta Holländer simple koliziis kun tio, kion la verkoj instruu al la spektantoj.

bildo de Kirilo
Abonrilata enhavo


povigita de