Ensaluto

Duonserioza projekto – mi instruas Esperanton al la du melopsitakoj de mia panjo

Dum ĉirkaŭ kvin semajnoj mi gastigas la du melopsitakojn de mia panjo. Ĝis nun (do dum la la pasintaj jaroj) ili ne sukcesis lerni la germanan, sed onidire Esperanto ja estas multe pli facila. Do kial mi ne provu lernigi al ili Esperanta(j)n vorto(j)n?

 

Mi intencas skribi taglibron pri mia tiurilata agado kaj la ebla (sed dubinda) sukceso :-)

(se mi ne sukcesas kompreneble nur kulpas mia manka sperto pri instruado, precipe pri instruado al melopsitakoj)

 

Unua semajno

  • Unua tago (vendredo): ili alvenis kaj ŝajne ankoraŭ bezonis alkutimiĝi al la nova ĉirkaŭejo. Mi aŭskultigis al ili Esperantan muzikon (ripetado de tiu kanto: https://www.youtube.com/watch?v=wJvcnKVEi34 ). Krome (kaj tion mi intencas daŭrigi) mi recitis al ili poemojn („Optimismo“ de Raymond Schwartz kaj „Sunsubiro“ de Kálmán Kalocsay) kaj iomete kantis (ekzemple: https://www.youtube.com/watch?v=2qvpH5as1mU kaj https://www.youtube.com/watch?v=XH2NAXDa3ec ). Kaj mi laŭtlegis al ili el la libro pri KAEST 2012 la enkondukon kaj la unuan ĉapitron (La plej freŝaj aktivadoj de E@I en la kampo de edukado). Ĝenerale ili ĝojis pri tio, sed uzis la okazon por mem babiladi anstataŭ atenteme aŭskulti.

  • Dua tago (sabato): mi ripetis la kantojn kaj poemojn, denove aŭskultigis al ili Jonny M kaj laŭtlegis al ili el la KAEST2012-libro la ĉapitrojn „Moderna edukado – ĉu tempo por ŝanĝo de paradigmoj?“ kaj „Vikipedio – kiel funkcias la libera enciklopedio“. Ili ŝajne aŭskultis la ĉapitron pri moderna edukado sed tute ne dum mi laŭtlegis pri Vikipedio. Nu, ne ĉiu interesiĝas pri ĉio, ĉu ne? Tio ja kompreneblas ankaŭ pro tio, ke Vikipedio ankoraŭ ne ekzistas en la melopsitaka lingvo.

  • Tria tago (dimanĉo): denove ili aŭskultegis Jonny M.
    Mi decidis ne laŭtlegi la ĉapitron pri ViVo (http://kono.be/vivo , kiu estas vortaro funkciante laŭ la vikia sistemo. La ligilo certe tamen utilas.
    Dum mi laŭtlegis pri Kono (http://kono.be ) - retprogramo por lerni parkere – ili denove babiladis. Malatentemaj birdetoj estas malbonaj lernantoj ;-)

  • kvara tago (lundo): la tago komenciĝis kun Jonny M
    dum mi laŭtlegis al la birdetoj pri BEK-umado (lingvokursoj kaj raporto pri la kurso „Esperanto Insulo 1) ili denove babiladis
    sed... dum mi laŭtlegis pri Muzaiko (www.muzaiko.info) ili silentis, do eble aŭskultis

  • kvina tago (mardo): ni legis la ĉapitron pri Duolingo. Ja estas planita ke iam (espereble baldaŭ) ĝi ankaŭ uzeblas por lerni Esperanton aŭ per Esperanto. Ĉar mi mem ankoraŭ ne uzis la retejon (www.duolingo.com ) mi trovis la artikolon sufiĉe interesa.

  • Sesa tago (merkredo): ni legis la ĉapitron pri Esperanto por triaaĝuloj kiun mi ege ŝatis, ĉar ĝi en simpatia maniero montras kiel utila Esperanto povas esti (interalie por batali kontraŭ la Alzheimer-malsano)

  • sepa tago (ĵaudo): ĉapitro „La biblioteko de la Interkultura Centro en Herzberg am Harz... la Esperanto-urbo“ - mi lernis kelkajn novajn aferojn, sed ĝenerale jam legis multe pri Herzberg kaj la ICH. Kiel komencanto mi jam estis tie, sed ĝis nun mi ne partoprenis je unu de la multaj kursoj tie.

 

Resumo de la unua semajno:

tutcerte la melopsitakoj ĝojas ke mi laŭtlegas al ili, sed verŝajne ne pro lernemo sed pro la akompano kaj la instigo al babilegado. Mi nun ofte nomas ilin (jes, Esperante) babileguletoj. :-)

 

Antaŭrigardo: la poemoj kaj kantoj verŝajne ne havas ajnan efikon kaj mi jam iomete pigriĝis pri tio. Mi daŭrigos oftan salutadon kaj la laŭtlegadon de tekstoj (kvankam mi faros tion pli pro propra interesiĝo ol por la birdetoj). La aferojn kiuj ripetiĝas mi ne plu mencios. Kaj mi ne skribos proprajn blogaĵojn sed nur aldonos novaĵojn ĉi tie en la komentoj (escepte se la melopsitakoj neatendite ja lernas iun Esperantan vorton)

 

bildo de Sunjo

Komentoj

bildo de Pablo

Esperanto estas nur internacia lingvo, ne interbesta lingvo ;)

 

 

Vi frenezas.

 

Bonan ŝancon!

bildo de Sunjo

Dankon Pablo ;-)

 

Do jen la dua semajno. Ĉar mi en tiu semajno ne havis multe da tempo kaj krome iomete malsaniĝis (gorĝa inflamo kiu ege malhelpis mian laŭtlegemon) ni ne multe progresis.

Do ni plulegis la KAEST2012-libron

  • la ĉapitron „Lingvoinstruado ne (nur) per kreto“

  • la ĉapitron „Retaj kursoj ĉe edukado.net“ (pri RITE, la kulturvojaĝo al Vjetnamio, la diversaj aliaj ebloj de la KLERIGEJO kiu ankaŭ ofertas liberajn kursojn kaj kunlaboron kun aliaj institucioj) – tiu ĉi ĉapitro donas impreson pri la malfacila laboro de tiuj kiuj volas utiligi Esperanton pri pli ol nur amuza babilado.

  • la ĉapitron „Superrigardo de la kurso e125“ - temas pri kurso kiu aperu pro la 125a jubileo de Esperanto sed ne estis ĝustatempe preta. Mi neniam antaŭe aŭdis pri la kurso, sed eble ĉar mi ne apartenas al la celgrupo kiu estas instruistoj

kaj ni eklegis pri „Problemoj de pedagogia terminaro en Esperanto“

bildo de Sunjo

dum la tria semajno mi ankoraŭ estis malsana - bona okazo por ke la birdetoj distris min anstataŭ mi ilin

 

kvara kaj kvina semajno

mi konfesas ke mi pigriĝis kaj daŭre nur malrapide progresas. Plaĉas al mi ankaŭ simple silente observi la birdetojn ;-)

tamen:

- ni finlegis la ĉapitron pri la problemoj de pedagogia terminaro en Esperanto

- Esperanto per rekta metodo en 32 lingvoj (se mi iam intencas instrui Esperanton mi pri tiu metodo certe okupiĝos)

- La radikoj de la Plena Ilustrita Vortaro kaj ilia kontribuo al la eduka rolo de SAT (interesa ĉapitro pri historio kaj intereskonfliktoj ĉe SAT pro limigitaj rimedoj)

- Lingvolernado per modernaj interretaj teknologioj: specifecoj, avantaĝoj kaj tiklaj punktoj (mi verŝajne neniam kreos propran interretan kurson, sed tamen tiu ĉi ĉapitro donis interesajn informojn pri la kreado de interretaj kursoj ĉefe per ekzemploj de slovake.eu - kaj la utilaj ligiloj eble utilas ankaŭ por aliaj celoj)

- Rekordoj kaj metodoj ĉe la Esperanto-Lernejo ĉe Eventoj en Budapeŝto (ke Esperantistoj pri la disvastigo de Esperanto havas avantaĝojn en Hungario mi jam antaŭe sciis. Tamen la artikolo donas interesajn informojn pri historio kaj la praktika funkciado de lingvoinstruado en Budapeŝto)

- Onomatopeoj kaj interjekcioj en Esperanto (domaĝe ke mi nur mem legis kaj ne povis aŭskulti la prelegon. La melopsitakoj eble iomete timis pro la strangaj sonoj)

- La Zagreba Metodo instrui Esperanton (ankaŭ pri tiu metodo mi pli okupiĝus se mi intencus instrui Esperanton)

 

 

 

 


povigita de