Ensaluto

Unua renkonto kun Esperanto

Ni rakontu, kiel kaj kiam ni renkontis Esperanton unuafoje

bildo de Tjeri
bildo de Christa627

Nu, nun mi memoras, ke la unua fojo, ke mi vidis la vorton "Esperanto", verŝajne estis en artikolo pri lingvoj en la enciklopedio World Book, de la fruaj 1960aj jaroj... Sed tio tute ne impresis min; mi eĉ ne sekvis la riferencon al la artikolo pri Esperanto, kaj kiam mi renkontis Esperanton kiel mi rakontis en la antaŭa afiŝo, mi ne memoris, ke mi antaŭe vidis tiun vorton.  Nur kiam mi ŝance relegis tiun artikolon iam poste, mi pensis, "Hej, tiu ĉi artikolo mencias Esperanton!" kaj tiam memoris, ke mi legis tiun artikolon antaŭe.

"Ekzistas nur du specoj de lingvoj: tiuj, pri kiuj oni plendas, kaj tiuj, kiujn neniu uzas." — Bjarne Stroustrup (tradukita el la angla)

bildo de Christa627

Interreta kuniklo-vojo!  Mi jam rakontis tion multfoje, do, mi nur faros kopii-glui de alia retejo ( http://www.lang-8.com ):

 

"Kiel mi diris en alia afiŝo, mi kapablas skribi inverse. Tial mi interesiĝis pri Leonardo da Vinĉi, ĉar ankaŭ li skribis tiel. Kiam io interesas min, mi legas pri ĝi ĉe Vikipedio. Do, mi tion faris, kaj de la artikolo pri Leonardo da Vinĉi, mi iris al artikolo pri inversa skribo, kaj de tie, al artikolo pri tien-reena skribo. Tie estis ligilo al la retpaĝaro de iu ulo, kiu faris programon por fari tien-reenan tekston. Ĉe tiu retpaĝaro ( http://www.traevoli.com ), estis ankaŭ aliaj aferoj, ekzemple, kiel fariĝi ambaŭmana (tia mi jam estis), kiel ludi pianon inverse (interesa ideo!), kaj kiel paroli inverse (ĉu tio vere eblas?). Do, mi konkludis, ke la pensmaniero de tiu persono evidente estas simila al la mia; same stranga :-). Tie estis ankaŭ paĝo pri Esperanto, multaj reklamaĵoj por lernu.net, kaj multaj partoj de la paĝo tradukitaj al Esperanto. Do, mi legis tion, kion li diris pri ĝi, kaj pensis (en la angla), "Internacia lingvo? Kia freneza ideo!" Sed, mi estas ĉiam scivola, do, kelkajn tagojn poste, mi iris al http://www.lernu.net, kaj komencis esplori la retejon kaj legi pri Esperanto; ne kun tre granda intereso, sed nur pro scivolo. Sed, kiam mi legis, ke neregulaj verboj tute ne ekzistas en Esperanto, tiam mi tuj ekscitiĝis! (Vi devas scii, ke mi ĉiam malamis/malamas/malamos neregulajn verbojn kaj similaj neregulaĵojn!) Mi sentis kvazaŭ mi trovus tion, kion mi ĉiam serĉis! Kaj ekde tiam, mi lernas Esperanton senĉese, kaj amas ĝin pli kaj pli! Jes, ĉiuj lingvoj interesas min, sed mi vere amas nur Esperanton."

 

Tio okazis je la 16a de Novembro, 2013.

 

http://lang-8.com/788969/journals/316871111874395063386145137169662938218

"Ekzistas nur du specoj de lingvoj: tiuj, pri kiuj oni plendas, kaj tiuj, kiujn neniu uzas." — Bjarne Stroustrup (tradukita el la angla)

bildo de Ĝan Ŭesli Starling

Mi unue trovis Esperanton inter la paĝoj de sciencfikcia romanaro pri la Rustimuna Ŝtalrato. Ĉe la fina paĝo de libro sesa estis reklamo diranta, ke la lingvo Esperanto menciita ne estas fikciaĵo, ke ĝi vere ekzistas. Mi sendis por peti informon. Tio estis en 1982.

bildo de Sunjo

Mi legis artikoleton pri Esperanto en nia ĉiutaga urba gazeto (detalojn mi ne plu memoras). Tiam mi havis eble 17 aŭ 18 jarojn, trovis la ideon interesa sed ne tuj okupiĝis pri la lingvo.

bildo de Tjeri

 

Mi memoras la unuan fojon, kiam mi aŭdis pri Esperanto.

Mi estis ĉirkaŭ dekjara, kaj estis leganta iun bildstrian rakonton. En tiu rakonto du alimondanoj renkontis homon, kaj demandis ion al li per strangaj nekompreneblaj frazoj, kaj la homo diris: "Kio estas tiu volapuko?"

Mi ne komprenis tiun vorton, kaj aliris la patron por demandi. Li klarigis, ke temas pri konstruita lingvo malfacila, kaj aldonis, ke ekzistas alia , Esperanto, pli facila. Li diris ankaŭ, ke tiaj lingvoj ne estas vere uzataj.

Nu, almenaŭ pri Volapuko, li pravis....


povigita de